Izrael
Każde rano o pióntej nas w betlymskim hotelu
Z blizkigo minaretu budziły islamski śpiywki
A potym my jechali na Pastyrski Pola
Kaj Anioł zwiastowoł pastyrzóm
Że se dzisio narodził w Betlymie Jezus Syn Bożi
Obrónno twierdza Króla Heroda Wielkigo
Kiery mierził yny przez meter a pół
Sie wspinała na kopcu nad wojynskimi kasarniami
A były tamstyl piekne widoki
Na palestyński kopce, na miasto Betlejem a też Jeruzalem
W Betlymie wedla rynku je Bazylika Narodzynio
Jezusa Krystusa, dostaniesz se tam wchodym
Kiery je tak niski, jak w tym wtipu o Hugowi
Że se musisz ognyć skoro aż ku ziymi
Stoji to ale za to, bo tu sie narodził mały Jezusek
Przez check point jadymy do pustynie Wadi Quelt
Kaj Jezus strowił sztyrycet dni w pokuszyniu szatana
A potym na Masade, twierdze nad Mortwym Morzym
Kaj sie Żidzi tak dłógo brónili Rzimianóm
A aby sie nimi nie niechali zotroczić, tak sami sebie wybili
A w Mortwym Morzu, jak se legniesz do wody
Tak óna cie nadnoszo, jak nafukowacóm madrace
Odpływiesz kónsek od brzegu a nie dosz nogi na dno
Bo ta woda je tak gynsto a kładzie taki odpor
Trzista gramów soli na jedyn liter wody, gdo nie zażił, nie uwierzi
W Nazaretu je kościół, tam Anioł zwiastowoł Maryji
Że beje Matkóm Boskóm a my w nim zaśpiywali
Cichóm noc a za chwile my płynyli
Replikóm łódki Jezus Boat po Galilejskim Jeziorze
A kónsek tamstyl je Yardenid, tam krzci sie w Jordanu
Miastym Króla Dawida je Stary Jeruzalem
Wszecy tam jeżdżóm rzykać, Żidzi, Muslimi, Chrześcianie
Oliwowo Góra, Via Dolorosa
Krziżowo droga wiedzie aż tam na Golgote
Meszita Al-Aksa, Grób Króla Dawida, u Ściany Płaczu rzykómy
Góra Moria a Bożi grób, wszecy za lepszi świat
© Tomáš Tomanek
|
